سەرۆکی زانکۆ

داڕشتنى روانگەيەك بۆ دەزگايەكى ئەكاديمى وەك زانكۆ, پەيوەستە بە بينينێكى واقعييانەى بارودۆخى زانكۆكە لەلايەك و تواناكانى بۆ بەرزكردنەوەى ئاستى زانستى بەشێوەيەكى گشتى, تا كاريگەرى هەبێ بەسەر ئەو زەمينە كۆمەلآيەتييەى تێيدا سەرى هەڵداوە و دەخوازێ چالآكانە رۆڵى لە گۆڕينى بارودۆخەكەى بەرەو باشتر و پێشكەوتوتر هەبێ. روانگەى ئێمە لەوەوە سەرچاوە دەگرێ, كە زانكۆكە بتوانێ لە كۆيەوە خەون بە وەرچەرخانێكى گەورەى زانستى لە ئاستى هەرێمدا ببينێ و رۆڵى لە داڕشتنى بەرنامەيەكى پێشكەوتووى زانستى لەو ئاستەدا هەبێ و ببێتە سەرچاوەيەكى باوەڕپێكراو.
لێرەوە, لەخوارەوە هەوڵدەدەم, لە دوتوێى چەند خالێكدا, گرنگترين ئەو هەنگاوانە بخەمەڕوو, كە پێموايە هاوكارم دەبن لە هێنانەدى ئەم روانگەيە: 

  • كاردەكەم بۆ ئەوەى زانكۆ لە لایەنەكانی زانستی و كارگێڕی و دارایی سەربەخۆبێت خاوەن بڕيارى تايبەت بێت. ئەمەش بە هەوڵ و كاركردن لەگەڵ ستافی ئەندامانی ئەنجومەنی وەزارەت و ستافی وانەبێژان لە زانكۆی كۆیە.
  • ە پلانمدا بەو ئاراستەیە كاردەكەم, كە ناوی وەزارەتی خوێندنی باڵا و توێژینەوەی زانستی ببەمە بواری كرداری. بەجۆرێك كە زانكۆی كۆیە هەم لە خوێندنی ئاستی باڵا و هەم لە توێژینەوە هەنگاوى كردەكى بۆ پێشەوە بهاوێژێ.
  • پێموايە زانكۆى سەركەوتوو ئەو زانكۆيەيە, كە تەواوى ستافەكەى وەك يەك تيمى تەواوكەرى يەكتر كار بكەن. بۆيە نابێ لەو پەيامە كولتورييە گرنگەى زانكۆ هەڵيگرتووە, هیچ كەسێك لە بیربكرێ و بە جێ بمێنێ. ئمەش ئەوكاتە سەركەوتوو دەبێ, كە كەسە چالآكەكان دەست خۆشیان لێ بكرێت تا لەوكارەى ئەنجامى دەدەن بەردەوام بن و هانى ئەوانی تريش بدرێ تا چاویان لێ بكەن و ڕۆحی كێبركێی ئازاد و شەرافەتمەندانەيان پەرەى پێ بدرێ.
  • ئەرك و بەرپرسیارەتیمە كە (Rank) ی ئێستای زانكۆی كۆیە وەك چوارەم زانكۆ لەسەر ئاستی كوردستان, وەكو خۆی ڕاگرم و هەوڵی بەرزكردنەوەشی بدەم بۆ ئاستی بەرزتر نەك هەر لە ئاستى هەرێم و عێراقەوە, بەڵكو لە ئاستى جيهانيشدا ئەم كارە بكەم. لەم روانگەيەوە هەوڵدەدەم پەیوەندیەكانى لەگەڵ دونیای دەرەوە باشتر بكەم و پتەوتری بكەم.
  • پلان و بەرنامەی من ئەوە دەبێ , كە زانكۆی كۆیە بەشدارێكی كارا و گرنگی پێشكەوتنی شاری كۆیە و دەوروبەری بێت و بیرۆكە و تۆێژینەوەی زانستی بۆ چارەسەری گرفتە جۆراوجۆرەكان دابنێ  و رۆڵى لە داڕشتنى پلانە ستراتيجييەكانى ناوچەكە, بە پێوەرى زانستى, هەبێ شان بە شانی ئەمەش سەنتەرەكانی توێژینەوەی زانستی لە بوارە جۆراوجۆرەكان گرنگیان پێ بدرێت و پەرەیان پێ بدرێت و پێداویستیەكانیان دابین بكرێت, تا لە ئاستى خواستەكانى توێژەران بێت و كاريگەرى بەرچاويان لە داڕشتنى بڕيارەكان دەربكەوێ و داهێنانى زانستى توێژەران لەخۆ بگرن و برەوى پێ بدەن و رۆڵيان هەبێ لە رێنمايى كردن و بلآوكردنەوەى توێژينەوەى مامۆستاكانى زانكۆ لە گۆڤارە زانستيە  پێشكەوتووەكانى جيهان. 
  • لە داهاتویەكی زۆر نزیك كار لەسەر دوو شت دەكەم لەگەڵ ئەندامانی ئەنجومەنی زانكۆ و ستافی زانستی, ئەويش فراوانكردنى زانكۆ, لە رێگەى كردنەوە و بواژاندنەوەى بەشە زانستييەكانى, لەوانەش كردنەوەی بەشى تايبەتمەند كە خوێندن تيايدا لە تەواوی بابەتەكان و ساڵەكانی خوێندن بە زمانی ئینگلیزی بێت و پەيڕەوى ستانداردە جيهانييەكانى تێدا بكرێ كە تیایدا هەوڵی بەستنەوەی زانكۆی كۆیە بە كرداری بدرێت بە تەواوی میللەتانی دونیا. ئەمە سەربارى دانانی بەرنامەیەكی گونجاو بۆ فێربوونی زمان چ زمانى كوردی بێ بۆ خەڵكی بیانی لە زانكۆی كۆیە, يانيش زمانى ئينگليزى بێ بۆ كادير و ستافى زانكۆ, تا لە پێشكەوتنە زانستييەكان جيهان هەرگيز دانەبڕێن. 
  • هەوڵدەدەم پرەنسیپی (Long Live Learning) بخرێتە قاڵبە ڕاستەكەی خۆی و ووردە ووردە زانكۆ بەرەو ئەو ڕێبازە بەرنامەی گونجاو دابنێ. بۆ ئەمەش خوێندنی پاڕالێل و بەپارە , لەگەڵ  ڕەچاوكردنی دۆخی دارایی هاوڵاتیان, پەرەی پێ بدرێت و قۆناغ بە قۆناغ بێت. 
  • لەهەمان روناگەوە دەخوازم زانكۆ جگە لە بڕوانامەكانی بەكالۆریۆس و ماستەر و دكتۆرا , بەرنامەى (دبلۆمی باڵا) ش, لە هەندێك پسپۆڕی ببەخشێت بۆ پێشخستنى تواناكانى ئەوانەى دەخوازن لە كۆرسى تايبەت و پسپۆڕدا بەشدار ببن و ئەو بڕوانامەى تێدا بەدەست بهێنن . سەرەڕای ئەمانەش خولی كورت خایەن و درێژخایەن بۆ بابەت و كێشەی دیاری كراو هەبێت.
  • هەوڵی خۆشم لەگەڵ ئەندامانی كارای ستافی زانكۆ و ڕاوێژكاران و ئەندامانی ئەنجومەنی وەزارەتی خوێندنی باڵا و توێژینەوەی زانستی دەخەمە گەڕ كە لە ڕووی یاسایی و دارایی و .......هتد, دەسەڵات بدرێت بە زانكۆمان كە بەدواداچوون بۆ دەرچوانی زانكۆمان بكەین دوای دەرچونیان تا چەند ساڵێك بۆ دڵنیا بوون لە ئاستەكانیان و توانستیان ودەست كەوتنی كار دوای خوێندنی زانكۆیی.
  • كار دەكەم بۆ برەوپێدانى تواناكانى مامۆستايان, بەجۆرێك كە ناسنامەيان لە چوارچێوەى وانەوتنەوەدا چڕ نەبێتەوە. بەڵكو وەك توێژەر و پسپۆڕى زانستى ناوبانگ دەربكەن, ئەمەش بە پێشخستنى توناكانيان, لە ميانەى كردنەوەى خولى پەرەپێدانى زانستى و هەوڵى شاندكردنيان بۆ ئاشنابوون بە ئەزموونى هاوكارەكانيان لە زانكۆ پێشكەوتووەكانى جيهان.
  • ئەكتيڤ كردنى رۆڵى خوێندكاران لە نێو زانكۆ, بەجۆرێك كە تەنيا وەرگرى زانست و زانين و بەدەستهێنەرى بڕوانامەى بێ ناوەڕۆك تەماشا نەكرێن, بەڵكو وەك بەرهەمهێنەر و بەشدار لە كارى زانستيش مامەڵەيان لەگەڵدا بكرێ. ئەمە سەربارى ئەوەى زانكۆ بتوانێ ببێتە شوێنێك بۆ گەشەپێدانى توانا و ئارەزووە كەسييەكانيان. هەروەها بتوانێ كەسێتى ئەوان لە ڕووى هزرييەوە بەجۆرێك پتەو بكات, كە بە ئاسانى نەكرێنە ئامانجى رەوتە ناباو و ناجۆرەكان و سودى خراپ لە تواناكانيان ببينرێ, ئەوەندەى وەك كەسى ئەكتيڤ دەربكەون, كە بە كاريگەرى خوێندن و فێربوونى زانكۆييان, رۆڵيان لە دروستكردن و ئاڕاستەكردنى دروستى ڕاى گشتى لە نێو كۆمەڵگاكەيان هەبێ.

لە هەموو ئەو كار و بەرنامانەی سەرەوەمان دڵنیایی جۆری پڕۆسەیەكی لە بییرنەكراو و چەسپاو دەبێت بەردەوام دەبین لەسەری بۆ كەم كردنەوەی لەمپەرەكانی بەردەمی و بەرزكردنەوەی توانستی بەردەوامی و باشی پڕۆسەكە. 

د. ولى محمود حمد
سەرۆکی زانکۆی كوية
5/2/2015

تکایە لاپەڕەی ئاکادمی من ببینن


Masters by a combination of research and coursework or by pure research in PhD level. (read more)


Knowledge Transfer is our main stream principal way to communicate in and outside our academic community (read more)


With 4 faculties and 25 departments in different fields we aiming to become a centre of excellence. Join us...