لە زانکۆی کۆیە دەستاودەستکردنی پۆستەکانی یاریدەدەری سەرۆکی زانکۆ بۆ کاروباری زانستی و خوێندنی باڵا، ڕاگری فاکەڵتیی ئەندازیاری، ڕاگری فاکەڵتیی زانست و تەندروستی و ڕاگری فاکەڵتیی پەروەردەی وەرزش کرا.
ڕۆژی چوارشەممە ٢٤ی ئایاری ٢٠٢٣، بە سەرپەرشتی بەڕێز سەرۆکی زانکۆی کۆیە پ.ی.د محمد حسیب صدیق و ئامادەبوونی بەڕێزان ئەندامانی ئەنجوومەنی زانکۆ لە ڕێوڕەسمێکی تایبەتدا دەستاودەستکردنی پێنج پۆست لە زانکۆی کۆیە بەڕێوەچوو.
لە دەستپێکی ڕێوڕەسمەکەدا بەڕێز سەرۆکی زانکۆ سوپاسی ئەرک و ماندووبوونی یاریدەدەر و ئەو ڕاگرەکانە کرد کە ئەرکەکانیان رادەست دەکەنەوە لە پای دڵسۆزانە راپەڕاندنی ئەرکەکانیان و رایگەیاند کە جێ دەستیان لە کارەکاندا دیار بووە و هیوای خواست کە بەردەوامبن لە کارکردن بۆ خزمەتی زانکۆ و هاوکار و هەماهەنگبن لەگەڵ جێگرەوەکنیان.
بەڕێز سەرۆکی زانکۆ، هەروەرها پیرۆزبایی لە یاریدەدەر و ڕاگرە تازەکان کرد و هیوای خواست کە لە ماوەی ئەرکانیاندا هەوڵ و کاری خۆیان بکەنە خزمەتی زانکۆی کۆیە.
دواتر، لە رێوڕەسمێکی تایبەتدا بەڕێز سەرۆکی زانکۆ سوپاسنامە و ڕێزلێنان و چەپکە گوڵی بەخشییە بەڕێزان یاریدەدەری سەرۆکی زانکۆی کۆیە بۆ کاروباری زانستیی و خوێندنی باڵا بەڕێز پ.ی.د حەیدەر لەشکری، ڕاگری فاکەڵتیی ئەندازیاریی زانکۆی کۆیە بەڕێز پ.ی.د گەلاوێژ بەکر باپیر، ڕاگری فاکەڵتیی پەروەردەی وەرزش بەڕێز پ.ی.د نەبەز عبداللە و ڕاگری فاکەڵتیی زانست و تەندروستیی بەڕێز پ.ی.د تەها جلال لەپای خزمەتکردنیان و ڕاپەڕاندنی ئەرکی کارگێڕیی و زانستییان لە پۆستەکانیان لە ماوەی ڕابردوودا.
هاوکات هەر لە هەمان رێوڕەسمدا، بەڕێز سەرۆکی زانکۆی کۆیە بەڕێز پ.ی.د محمد حسیب صدیق بەبۆەی دەستبەکاربوونیان چەپکە گوڵی پیرۆزبایی پێشکەشی بەڕێزان یاریدەدەری نوێی سەرۆکی زانکۆ بۆ کاروباری زانستیی و خوێندنی باڵا پ.ی.د هەڵگورد سەرهەنگ، ڕاگری نوێی فاکەڵتیی ئەندازیاری پ.ی.د ئەژین تاهیر، ڕاگری نوێی فاکەڵتیی زانست و تەندروستی پ.د زرار سلیم، ڕاگری نوێی فاکەڵتیی پەروەردەی وەرزش پ.د نەوزاد حسین درویش و ڕاگری فاکەڵتیی پزیشکی د. دەوەن جەمال حەوێزی کرد.
