سەرۆکی زانکۆی کۆیە لەگەڵ لیژنەی باڵای ئامادەکاری پڕۆسەی وەرگرتنی خوێندکارە تازە وەرگیراوەکان کۆبوویەوە
سەرۆکی زانکۆی کۆیە، پ.ی.د. محمد حسیب صدیق سەرۆکایەتیی کۆبوونەوەی لیژنەی باڵای ئامادەکاری پڕۆسەی وەرگرتنی خوێندکارە تازە وەرگیراوەکان لە زانکۆی کۆیە کرد.
ڕۆژی دووشەممە ٢٢ی ڕەزبەری ٢٧٢٤ی کوردی بەرانبەر ١٤ی تشرینی یەکەمی ٢٠٢٤ی زایینی، سەرۆکی زانکۆی کۆیە پ.ی.د. محمد حسیب صدیق بە مەبەستی دانانی ڕێوشوێنی تایبەت بە پێشوازیکردن لە خوێندکارە تازە وەرگیراوەکان لە زانکۆی کۆیە لەگەڵ ژمارەیەک بەڕێوەبەری بەڕێوەبەرایەتییە پەیوەندیدارەکان کۆبوویەوە.
ئەم کۆبوونەوەیە بە ئامادەبوونی یاریدەدەری سەرۆکی زانکۆی کۆیە بۆ کاروباری کارگێڕی و دارایی پ.ی.د. یادگار عبد الله علی، بەڕێوەبەری تۆماری گشتیی زانکۆی کۆیە د. صافیة صابر، بەڕێوەبەری بەڕێوەبەرایەتیی ڕاگەیاندنی زانکۆی کۆیە م.ی. محمد کریم سیدگوڵ، بەڕێوەبەری بەڕێوەبەرایەتیی دڵنیایی جۆریی م. ئالان نەهرۆ، بەڕێوەبەریی بەڕێوەبەرایەتیی تەکنۆلۆژیای زانیاریی(ئای تی)ی زانکۆی کۆیە م. ژاوین عبداللە مصطفی، بەڕێوەبەری کاروباری یاسایی مافپەروەر شێواز حەوێزی، بەڕێوەبەری بەڕێوەبەرایەتیی بەشەناوخۆییەکانی زانکۆی کۆیە م.کەریم احمد حمد، بەڕێوەبەری دارایی مەریوان رزاق حمدامین و فەرمانبەر لە بەڕێوەبەرایەتیی دڵنیایی جۆریی م.ی. هاوڕێ جبار حمد لە سەرۆکایەتیی زانکۆی کۆیە بەڕێوەچوو.
سەرۆکی زانکۆی کۆیە پ.ی.د. محمد حسیب صدیق لەمیانەی کۆبوونەوەکەدا بە گرینگییەوە باسی لە ئامادەکاریی تەواوەتی زانکۆ و بەتایبەتی بەڕێوەبەرایەتییە پەیوندیدارەکان بۆ پێشوازی لە خوێندکارانی دەرچوو کرد تاکوو ئەوپەڕی ئاسانکاریی بۆ دەرچووان دەستەبەر بکرێ و مامەڵەکانیان بەشێوەیەکی ڕێکوپێک بەڕێوەبچێ و هەوڵبدرێ شوێنی تایبەت بۆ پیشوازی دابین بکرێ و هاوکات لە ڕێگای پلاتفۆرمەکانی سۆسیالمێدیاوە بەڕێوەبەرایەتیی ڕاگەیاندنی ڕاسپارد تاکوو بەرچاوڕوونیی پێویست بۆ دەرچووان دەستەبەر بکەن.
لە ئێستادا و دوابەدوای کۆتاییی زانکۆلاین دەرچووانی پۆلی دوازدەی ئامادەیی چاوەڕوانی گەڕانەوەی ناویانن لە بەش و زانکۆ جیاوازەکانی هەرێمی کوردستان و بێگومان زانکۆی کۆیە یەکێکە لە بژاردە بەرچاوەکانی دەرچووان هەربۆیە لەو ڕاستایەدا ئەم کۆبوونەوەیە بە مەبەستی هەڵسەنگاندنی ئامادەکارییەکان و گفتوگۆی پێشنیارەکان بۆ پڕۆسەی مامەڵەی وەرگیرانی دەرچووانی پۆلی دوازدە پێکهێنرابوو.
