خوێندکارانی بەشەکانی ئەندازیاریی شارستانی و ئەندازیاریی جیۆتەکنیکی زانکۆی کۆیە بەشداربوون لە گەورەترین پێشانگای بیرۆکە و داهێنان بۆ پڕۆژە ئەندازیارییەکان

خوێندکارانی بەشەکانی ئەندازیاریی شارستانی و ئەندازیاریی جیۆتەکنیک لە فاکەڵتیی ئەندازیاریی زانکۆی کۆیە بە پڕۆژەی " Eco Glow turf stone & Plastic road" بەشداربوون لە گەورەتری پێشانگای بیرۆکە و داهێنان بۆ پڕۆژە ئەندازیارییەکان بەناونیشانی "  Innovation Expo for Engineering ‎"، ئەم پێشانگایە لە ڕۆژی یەکشەممە ٢٠ی نیسانی ٢٠٢٥ی زایینی لە زانکۆی نۆوڵێج لە هەولێری پایتەختی هەرێمی کوردستان بەڕێوەچوو.

تیمی خوێندکارانی فاکەڵتیی ئەندازیاریی زانکۆی کۆیە بە سەرپەرشتی پ.ی.د ڕەهێڵ خالد ابراهیم پێکهاتبوون لە عبدالسمیع ڕێبوار ئەندازیاریی شارستانی، لاڤین ئازاد ئەندازیاریی شارستانی، ڕۆزیتا محمد ئەندازیاریی جیۆتەکنیک، ڤینا جەمال ئەندازیاریی شارستانی، هوما ئەرسەلان ئەندازیاریی شارستانی کە توانیان پلەی دووەم لە پۆلی ئەندازیاریی شارستانی و تەلارسازی لەسەرئاستی ١٩ زانکۆ و ١٧٥ گروپی بەشداربوو بەدەست بهێنن.

زانکۆی کۆیە پاڵپشت بە پلانی ستراتیژی و کۆڵەکەی سەرەکیی "سەرکەوتنی خوێندکاران و ئامادەسازییان بۆ بازاڕی کار" هەوڵ دەدات بوار و دەرفەتی لەبار بۆ خوێندکاران بڕەخسێنێ برەو بە تواناییە ئاکادیمی و پیشەییەکانی خۆیان بدەن.