کۆیە | ڕاگەیاندنی زانکۆ
کردنەوەی پارک لە بیست‌وسێهەمین ساڵیادی دامەزراندنی زانکۆدا
هاوکات لەگەڵ بیست‌وسێهەمین ساڵیادی دامەزراندنی زانکۆی کۆیە، لە ڕێوڕەسمێکی شایستەدا «پارکی بەردی بناغەی زانکۆی کۆیە» کرایەوە، کە وەک پڕۆژەیەکی ژینگەدۆست و بە هاوبەشی لەنێوان زانکۆی کۆیە و دامەزراوەی سەرۆک جەلال تاڵەبانی دروست کراوە.
ئامادەبووانی ڕێوڕەسمەکە
ڕێوڕەسمەکە ڕۆژی یەکشەممە ١١ی تشرینی یەکەمی ٢٠٢٦ بە ئامادەبوونی قوباد تاڵەبانی، جێگری سەرۆکی ئەنجوومەنی وەزیرانی هەرێمی کوردستان، باڵیۆز د. محمد سابیر، سەرۆکی دامەزراوەی سەرۆک جەلال تاڵەبانی، پ.د. محمد حسیب صدیق، سەرۆکی زانکۆی کۆیە، حاکم طارق حەیدەری، قایمقامی قەزای کۆیە، خاتوو کوردۆ عومەر، لێپرسراوی مەڵبەندی ڕێکخستنی کۆیەی (ی.ن.ک)، ئەندامانی ئەنجوومەنی زانکۆ و ژمارەیەک لە مامۆستایان و بەڕێوەبەرانی زانکۆ بەڕێوەچوو.
پاراستنی بەهای مێژوویی و دیدگای سەوز
پڕۆژەکە بە مەبەستی پاراستنی بەها مێژوویی و مەعنەوییەکەی شوێنی بەردی بناغەی زانکۆی کۆیە ئەنجام دراوە، کە تێیدا شوێنەکە گۆڕدراوە بۆ پارکێکی هاوچەرخی ژینگەدۆست و بەردەوام. ئەم هەنگاوە تەواوکەری دەستپێشخەریی «زانکۆی سەوز» و پلانی ستراتیژیی زانکۆی کۆیە (٢٠٢٣–٢٠٢٧)ـە بۆ زیادکردنی ڕووبەری سەوزایی و گۆڕینی کەمپەس بۆ ژینگەیەکی پڕ لە ئارامی و سروشتدۆست.
وتاری سەرۆکی زانکۆی کۆیە
لە دەستپێکی ڕێوڕەسمەکەدا، سەرۆکی زانکۆی کۆیە، پ.د. محمد حسیب صدیق، لە وتارێکدا باسی لە گرنگیی مێژوویی و سیمبوڵیی ئەو شوێنە کرد کە سەرۆک مام جەلال بەردی بناغەی زانکۆکەی لێ دانا، ڕوونی کردەوە کە لەو سۆنگەیەوە بڕیار درا بکرێتە پارکێکی سەردەمیانە و بەردەوام. سەرۆکی زانکۆ سوپاسی پشتیوانی و خەمخۆریی بەردەوامی قوباد تاڵەبانی کرد بۆ کەرتی خوێندنی باڵا بە گشتی و زانکۆی کۆیە بەتایبەتی.
لادانی پەردە و بەسەرکردنەوەی پێشانگای بەڵگەنامەیی
لە کۆتاییی ڕێوڕەسمەکەدا، پەردە لەسەر بەردی بناغەی زانکۆ لادرا، پاشان جێگری سەرۆکی ئەنجوومەنی وەزیران و سەرۆکی زانکۆ و میوانان، پێشانگای وێنەیی و بەڵگەنامەیی قۆناغە مێژووییەکانی شوێنەکە و قۆناغەکانی کارکردن لە پڕۆژەی پارکی بەردی بناغەیان بەسەرکردەوە.
نووسین و هەواڵ و بڵاوکردنەوە | محمد کریم سیدگوڵ
فۆتۆ | دڵشاد جمیل کاکەڕەش
