بەشی زمانی کوردی وۆرکشۆپی "زمانی دایک و گەشەسەندنی ئەدەبیاتی کوردی، دڵدار بە نموونە"ی لە زانکۆی کۆیە بەڕێوەبرد
بەشی زمانی کوردی لە فاکەڵتیی پەروەردەی زانکۆی کۆیە لە بەرەبەری ڕۆژی جیهانیی زمانی دایک بە مەبەستی بەرزڕاگرتنی ئەو ڕۆژە و گفتوگۆی پرسە پەیوەندیدارەکانی ئەو بوارە وۆرکشۆپێکی بە ناونیشانی "زمانی دایک و گەشەسەندنی ئەدەبیاتی کوردی، دڵدار بە نموونە" بەڕێوەبرد.
ڕۆژی سێشەممە ١٧ی شوباتی ٢٠٢٦، بە ئامادەبوونی سەرۆکی زانکۆی کۆیە پ.د. محمد حسیب صدیق، ئەندامانی ئەنجوومەنی زانکۆی کۆیە، توێژەران و مامۆستایان و خوێندکاران، بەشی زمانی کوردیی زانکۆی کۆیە وۆرکشۆپی "زمانی دایک و گەشەسەندنی ئەدەبیاتی کوردی، دڵدار بە نموونە"ی بە مەبەستی بەرزڕاگرتنی ڕۆژی زمانی دایک لە هۆڵی سەرۆکایەتیی زانکۆی کۆیە بەڕێوەبرد.
سەرەتای وۆرکشۆپەکە بە سروودی نەتەوەییی "ئەی ڕەقیب" و وەستان بۆ ڕێزگرتن لە گیانی شەهیدانی کورد و کوردستان دەستی پێکرد.
دواتر سەرۆکی بەشی زمانی کوردی پ.ی.د. تەلار صباح چەند وتەیەکی پێشکەش کرد و ناوبراو وێڕای ڕوونکردنەوەی مەبەست و ئامانجەکانی وۆرکشۆپەکە هەروەها باسێکی دەربارەی شاعیری نەتەوەیی و دانەری سروودی "ئەی ڕەقیب" دڵداری نەمر کرد.
بڕگەی دواتر هەریەک لە خوێندکار "هێما هێمن عبدالحمید شمس" وەک میوزیکژەن و "یەکێتی بەندی مەجید" وەک گۆرانیبێژ ئاوازی "شیرین و خوەشە زمانی کوردی"یان پێشکەش کرد.
پاشان پانێلی سەرەکیی وۆرکشۆپەکە لەلایەن پ.د.ڕێزان صالح مولود بەڕێوەبردرا و چەند بابەتێکی ئاکادیمی لەمەڕ زمانی دایک و "دڵدار"ی شاعیری ناوداری کورد پێشکەش کران، بابەتی "زمان وەک ناسنامە لە نێوان "خود" و "ئەوی تر"دا بە نموونەی شیعری دڵدار لەلایەن پ.د. دەریا جمال حەوێز، بابەتی "دڵدار و نووسین بە زمانی کوردی" لەلایەن پ.ی.د. هێمن عبدالحمید شمس، بابەتی "زمانی دایک لە سەردەمی زیرەکیی دەستکرددا" لەلایەن د. پەخشان فهمی فرحۆ، بابەتی "ڕۆڵی ئەدەبی منداڵان لە گەشەپێدانی زمانی دایک لای منداڵان" لەلایەن م. ڕەنجدەر ئازاد و بابەتی "دڵداری شاعیر و خانەوادەکەی سەنگەری بەرگری و پاراستنی زمانی دایک" لەلایەن م.ی. محمد مغدید عبداللە.
وەڵامدانەوەی پرسیار و پێشنیاری بەشداربووان بەشێکی تری بڕگەکانی وۆرکشۆپەکە بوو و دواتر بڕوانامەی بەشداریکردن بەسەر پێشکەشکارانی بابەتەکانی وۆرکشۆپەکە دابەش کرا.
ئەم وۆرکشۆپە وەک بەشێک لە باوەڕمەندی زانکۆی کۆیە بە پاراستنی زمان و چاندی کوردی و لە چوارچێوەی کۆڵەکەی سەرەکیی "توێژینەوە و داهێنان" و کۆڵەکەی سەرەکیی "خزمەتکردنی کۆمەڵگە"ی پلانی ستراتیژیی زانکۆی کۆیە بەڕێوە چوو.
محمد کریم سیدگوڵ، بەڕێوەبەری ڕاگەیاندن و هەواڵسازی کوردی
زانیار محمد محمد امین، هەواڵسازی کوردی
هێمن ابوبکر ابراهیم، گرافیک دیزاینەر و ووێب سایت
ڕێبین اسود عوڵا، وەرگێڕ کوردی - ئینگلیزی
لاڤە سەرباز طاهر، وەرگێڕ کوردی - ئینگلیزی
دڵشاد جمیل کاکەڕەش، فۆتۆگرافەر
سامان فاتح، ئەندازیاری دەنگ