کۆیە | ڕاگەیاندنی زانکۆ 

سەرۆکی زانکۆی کۆیە پ.د. محمد حسیب صدیق لە چوارچێوەی دیدارێکی تایبەتدا لەگەڵ ئەو خوێندکار و مامۆستایانەی کە توانیبوویان لە پاڵەوانیەتییە نێوخۆیی و جیهانییەکان دەستکەوت و سەرکەوتن بەدەست بهێنن سوپاس و پێزانینی بەخشییە خوێندکاران و مامۆستایانی سەرپەرشتی هەر دوو تیمی تێنسی سەرمێزی کچان و کوڕانی زانکۆی کۆیە.

ڕۆژی چوارشەممە ٣٠ی بانەمەڕ(گوڵان)ی ٢٧٢٦ی کوردی بەرانبەر ٢٠ی ئایاری ٢٠٢٦ی زایینی، سەرۆکی زانکۆی کۆیە پ.د. محمد حسیب صدیق لە دیدارێکی تایبەتدا لەگەڵ خوێندکاران و مامۆستایانی سەرکەوتووی زانکۆی کۆیە کۆبووەوە و لە میانەی دیدارەکەدا سوپاس و پێزانینی زانکۆی کۆیەی بەخشییە خوێندکاران و مامۆستایانی سەرپەرشتی هەر دوو تیمی تێنسی سەرمێزی کچان و کوڕانی زانکۆی کۆیە کە لە ماوەی ڕابردوودا لە پاڵەوانیەتیی تێنسی سەرمێزی زانکۆکانی کوردستان پلەی یەکەمی سەر ئاستی کچان و سێیەمی سەر ئاستی کوڕانیان بەدەست هێنابوو.

ئەم دیدارە لە سەرۆکایەتیی زانکۆی کۆیە بە ئامادەبوونی هەریەک لە یاریدەدەری سەرۆکی زانکۆ بۆ کاروباری کارگێڕی و دارایی پ.ی.د. یادگار عبداللە علی، یاریدەدەری سەرۆکی زانکۆ بۆ کاروباری خوێندنی باڵا پ.د. هشیار زکی، یاریدەدەری سەرۆکی زانکۆ بۆ کاروباری خوێندکاران پ.ی.د. ئەژین طاهر صابر، ڕاگری فاکەڵتیی پەروەردەی جەستەیی و زانستەوەرزشییەکان پ.ی.د. نەبەز عبداللە، ئەمینداری ئەنجوومەن م.ی. چیا جەوهەر و م. دلێر کەمال بەڕێوەبەری چالاکیی وەرزشی و هونەری بەڕێوە چوو.

خوێندکار، سەرمایەیەکی پڕ وزە و توانایی

زانکۆی کۆیە وەک دامەزراوەیەکی باوەڕمەند بە بەهرە و تواناییەکانی خوێندکار کە توێژێکی زیندوو و پر وزەی کۆمەڵگەیە لە پلانی ستراتیژیی خۆیدا کۆڵەکەی یەکەمی تایبەت کردووە بە کۆڵەکەی "سەرکەوتنی خوێندکاران" و لەو ڕوانگەیەوە سەرۆکی زانکۆی کۆیە پ.د. محمد حسیب صدیق لە چوارچێوەی ئەم دیدارەدا دەستکەوت و سەرکەوتنی خوێندکارانی لە پاڵەوانیەتییەکان و بەدەستهێنانی باوەڕبەخۆبوونی پێویست بۆ ڕکابەری لە مەیدانەکانی پاڵەوانیەتی و یارییەکانی بە گرینگییەوە باس کرد و ئامادەیی زانکۆی کۆیەی بۆ گشت پشتیوانییەک لە خوێندکاران دەربڕی.