کۆیە | ڕاگەیاندنی زانکۆ

 لە چوارچێوەی هەوڵە بەردەوامەکانیدا بۆ بەیەکەوەبەستنی توانا ئەکادیمییەکان و دامەزراوە مەدەنییەکان زانکۆی کۆیە و ڕێکخراوی بووژاندنەوەی کەلەپووری کوردی یادداشتنامەیەکی لێکتێگەیشتنی هاوبەشیان واژوو کرد. ئامانجی سەرەکیی ئەم ڕێککەوتنە کارکردنی هاوبەشە بۆ پاراستن، و پارێزگارییكردن لە دەستنووس و پەڕتووكی مێژوویی، تەلارە كەلتووریی و شوێنەوارە دێرینەكان لە شاری كۆیە.

ڕۆژی پێنجشەممە ٢٣ی تەمووزی ٢٠٢٦، بە چاودێریی جێگری سەرۆکی ئەنجوومەنی وەزیرانی هەرێمی کوردستان قوباد تاڵەبانی و بە ئامادەبوونی؛  ڕاوێژکاری جێگری سەرۆکی ئەنجوومەنی وەزیران بۆ کاروباری کلتووری و هونەری نەجات عبدوڵڵا، قائیمقامی قەزای کۆیە حاکم طارق حەیدەری، بەڕێوەبەری گشتی شوێنەوار و کەلەپووری هەرێم ئەندازیار ئاوارە کوێخا عەلی، بەڕێوەبەری شوێنەوار و کەلەپووری سلێمانی هاشم حەمە عبدوڵڵا، ئەندامانی ئەنجوومەنی زانکۆی کۆیە، بەڕێوەبەرانی کتێبخانەی ناوەندیی، پەیوەندییەکان و  خوێندنی باڵای زانکۆی کۆیە، بەڕێوەبەری شوێنەوار وکەلەپووری کۆیە یەکێتی واحید و تیمی ڕێکخراوی بووژاندنەوەی کەلەپووری کورد یادداشتنامەی لێکتێگەیشتن لە نێوان زانکۆی کۆیە و ڕێکخراوی بووژاندنەوەی کەلەپووری کورد لەلایەن سەرۆکی زانکۆی کۆیە پ. د. محمد حسیب صدیق و  سەرۆکی ڕێکخراوی بووژاندنەوەی کەلەپووری کورد عیرفان عوسمان ئەحمەدەوە واژوو کرا.

ڕوانگەی ستراتیژیی زانکۆی کۆیە

زانکۆی کۆیە لە چوارچێوەی پلانی ستراتیژیی ٢٠٢٣-٢٠٢٧ی خۆیدا کار لەسەر جێبەجیکردنی کۆڵەکە سەرەکییەکانی پلانەکە دەکات لە ڕێگەی ئەم یادداشتنامەی لێکتێگەیشتنەوە کار سێ کۆڵەکەی سەرەکی دەکرێت:

توێژینەوە و داهێنان (Research & Innovation): بەکارهێنانی دەستنووسە نەنوسراوەکان و دەقە مێژووییەکان وەکو سەرچاوەی یەکەمین بۆ توێژەران و خوێندکارانی خوێندنی باڵا، بە مەبەستی بەرهەمهێنانی زانیاریی نوێ و زانستی.

خزمەتکردنی کۆمەڵگە (Community Outreach): ساغکردن و پاراستنی ناسنامەی کلتووری و مێژوویی ناوچەکە، و دروستکردنی هۆشیاریی گشتی لەسەر گرنگیی سامانی کەلەپووری.

بەدیجیتاڵکردن (Digitalization): گواستنەوەی سەرچاوە و دەستنووسە کاغەزییەکان بۆ فۆرماتی دیجیتاڵی ئاست بەرز بۆ ئەوەی لە لەناوچوون بپارێزرێن و بە ئاسانی بخرێنە بەردەست توێژەرانی ناوخۆ و نێودەوڵەتی.

بوارەکانی هاوکاری و کارکردنی پێکەوەیی

ئەو بوارانەی هەردوو لایەنی ئەم لێك تێگەیشتنامەیە کە پێکەوە  کاری تیادەکەن بەدیاریكراوی ئەم خاڵانەی لای خوارەوە دەگرێتەوە:

1. پاراستن و مشتوماڵكردنی دەستنووسی مێژوویی
2. لێكوڵینەوە و توێژینەوەی زانستیی لەسەر دەستنووس.
3. ڕاهێنان و زیادكردنی توانا هونەرییەكانی پاراستنی دەستنووس.
4. هەماهەنگی لە بوارە هاوبەشەكان.
5. پاراستن و نۆژەندكردنەوەی خانوو و تەلارە كلتوورییەكان و شوێنەوارە دێرینەکان. 
6. بەدەست هێنانی كۆمەكی دارایی واتە (فەند) بۆ پڕۆژەكان

ئەم یادداشتنامەیە بە وێستگەیەکی نوێ و پڕبایەخ ئەژمار دەکرێت بۆ زیندواندنەوە و پاراستنی سامانی دەستنووسی کوردی بە ڕێکارێکی زانستیی هاوچەرخ، کە هاوکات بەشێکە لە ئەرکی نیشتمانیی زانکۆی کۆیە بۆ خزمەتکردنی کەلەپووری نەتەوەیی.