زانکۆی کۆیە لەسەر ئاستی هەموو زانکۆ حکوومی و تایبەتەکانی هەرێمی کوردستان لە بواری فێرکردن  (Teaching) بەگوێرەی نوێترین ڕیزبەندیی “THE Arab Ranking 2026” پلەی یەکەمی گرتووە   

زانکۆی کۆیە لە نوێترین ریزبەندیی تایمز THE Arab Ranking 2026 تایبەت بە هەڵسەنگاندنی لە بواری  فێرکردن  (Teaching)  پلەی یەکەمی لە سەر ئاستی سەرجەم زانکۆ حکوومی و تایبەتەکانی هەرێمی کوردستان بە دەست هێنا و لەسەر ئاستی عێراق یەکێکە لە سێ باشترین زانکۆکانی عێراق لەو بوارە بە پێی ریزبەندیی ئاماژە پێکراو  شایەنی باسە ئەم ئەنجامە لەسەر بنەمای چەند پێوەرێک دادەنرێت وەک ژینگەی لەبار بۆ فێربوون، بەهێزی ناوبانگی ئەکادیمی و ژمارەی ستافی ئەکادیمی بۆ ژمارەی خوێندکاران و ژمارەی هەڵگرانی دکتۆرا لە ناو ستافی ئەکادیمی هەروەها پاڵپشتی دارایی بۆ پەرەپێدانی توانای مامۆستایان بۆ نایابی وانە ووتنەوە و دابینکردنی پێداویستیەکانی فێرکردن. 

جێی ئاماژەیە زانکۆی کۆیە لە چوار چێوەی پلانی ستراتیژیی خۆی بە تایبەتی کۆڵەگەی یەکەم کار لەسەر  فەراهەم کردنی کەشێکی لەبار دەکات بۆ خوێندن و بەهێزکردنی پرۆگرامەکانی خوێندن و باشترکردنی ناوبانگی ئەکادیمی زانکۆ. 

ڕیزبەندیی تایمز بۆ زانکۆکانی وڵاتانی عەرەبی ڕیزبەندییەکی ساڵانەیە لەلایەن دامەزراوەی Times Higher Education بڵاو دەکرێتەوە لەم ریزبەندیە زانکۆی کۆیە ئەنجامی بەرچاوی بەدەست هێناوە لە سەرجەم پێوەرەکانی هەڵسەنگاندن و پلەی دووەمی لەسەر ئاستی زانکۆ حکوومییەکانی هەرێمی کوردستان بە دەست هێناوە لە کۆی گشتی و لە گرووپی ١٧٦-٢٠٠ لە نێوان زانکۆکانی وڵاتانی عەرەبی هاتووە. 

بوونی زانکۆی کۆیە وەک یەکێک لە باشترین شوێنەکانی فێربوون لە هەرێمی کوردستان و عێراق دەستکەوتێکی گەورەی ئەکادیمیە بۆیە بەم بۆنەیەوە پیرۆزبایی گەرم ئاڕاستەی سەرجەم مامۆستایان و فەرمانبەران و خوێندکاران و تەواوی کۆمەڵگەی زانکۆمان دەکەین.