سەرۆکی زانکۆی کۆیە هۆڵەکانی تاقیکردنەوەی بەسەر کردەوە

کۆیە | ڕاگەیاندنی زانکۆ

 سەرۆکی زانکۆی کۆیە پ.د. محمد حسیب صدیق، لە دەستپێکی خولی یەکەمی تاقیکردنەوەکانی کۆتاییی سیمیستەری دووەم لە سەردانێکی مەیدانیدا هۆڵەکانی تاقیکردنەوەی لە فاکەڵتییەکانی پەروەردە، زانستەمرۆڤایەتی و کۆمەڵایەتییەکان و زانست و تەندروستی بەسەر کردەوە.

 لەگەڵ دەستپێکی تاقیکردنەوەکانی کۆتاییی سیمیستەری دووەم لە زانکۆی کۆیە وەک ساڵانی ڕابردوو و پاڵپشت بە پلانی ستراتیژی و کۆڵەکەی "سەرکەوتنی خوێندکاران" و هاوکات بە مەبەستی لە نزیکەوە چاودێری و هەڵسەنگاندنی چۆنییەتیی بەڕێوەچوونی پڕۆسەی تاقیکردنەوەکان، سەرۆکی زانکۆی کۆیە پ.د. محمد حسیب صدیق بە یاوەری یاریدەدەری سەرۆکی زانکۆ بۆ کاروباری کارگێڕی و دارایی پ.ی.د. یادگار عبداللە علی، یاریدەدەری سەرۆکی زانکۆ بۆ کاروباری خوێندکاران پ.ی.د. ئەژین طاهر صابر، ئەمینداری ئەنجوومەن م.ی.چیا جەوهەر و بەڕێوەبەری ڕاگەیاندن م.ی. محمد کریم سیدگوڵ هۆڵەکانی تاقیکردنەوەی لە فاکەڵتییەکانی پەروەردە، زانستەمرۆڤایەتی و کۆمەڵایەتییەکان و زانست و تەندروستی بەسەر کردەوە.

 وێستگەی جیاواز، پڕ بەرهەم و پاڵپشت بە کۆڵەکەی "سەرکەوتنی خوێندکاران"

 ئەم سەردانە مەیدانییە کە چەندین وێستگەی جیاوازی لەخۆگرتبوو بە مەبەستی چاوەدێری و لە نزیکەوە هەڵسەنگاندنی پڕۆسەکە ڕێکخرابوو، سەرەتا و لە وێستگەی یەکەمدا لە فاکەڵتیی پەروەردە سەرۆکی زانکۆی کۆیە پ.د. محمد حسیب صدیق لەلایەن ڕاگری فاکەڵتیی پەروەردە پ.د. سەفین جلال و یاریدەدەرانی ڕاگر و سەرۆکی لێژنەی تاقیکردنەوەکان پێشوازییان لێکرا و دواتر هۆڵەکانی تاقیکردنەوە و لێژنەی تاقیکردنەوەکان بەسەرکرایەوە و لەو میانەدا سەرۆکی زانکۆی کۆیە پ.د. محمد حسیب صدیق وێڕای گفتوگۆ لەگەڵ خوێندکاران و مامۆستایانی چاوەدێر هاوکات لەگەڵ لێژنەی تاقیکردنەوەکان کۆ بووەوە و لەسەر چەندین بابەتی پەیوەندیدار بە تاقیکردنەوەکان دوان.

 سەردانی بەشی پەروەردەی ئایینی لە فاکەڵتیی پەروەردە بەشێکی تری ئەم وێستگەیە بوو و تێیدا سەرۆکی زانکۆی کۆیە و شاندی یاوەری لەلایەن سەرۆکی بەشی پەروەردەی ئایینی د. ئارەزوو نورالدین و مامۆستایانی بەش و لێژنەی تاقیکردنەوە پێشوازییان لێکرا.

 دواتر لە بەشێکی تری ئەم سەردنە مەیدانییەدا سەرۆکی زانکۆی کۆیە پ.د. محمد حسیب صدیق و شاندی یاوەری هۆڵەکانی تاقیکردنەوەی لە فاکەڵتیی زانستەمرۆڤایەتی و کۆمەڵایەتییەکن بەسەرکردەوە و لەلایەن ڕاگری فاکەڵتیی زانستەمرۆڤایەتی و کۆمەڵایەتییەکان پ.ی.د. الهام مجید قادر، یاریدەدەری ڕاگر و سەرۆکی لێژنەی تاقیکردنەوەکانی فاکەڵتیی ناوبراو پێشوازییان لێکرا و وێستگەیەکی تری دیدارەکە سەردانی هۆڵەکانی تاقیکردنەوەی فاکەڵتیی زانست و تەندروستی بوو و تێیدا سەرۆکی زانکۆی کۆیە لەلایەن ڕاگری فاکەڵتیی زانست و تەندروستی پ.ی.د. کۆسرەت نژاد کاکە، یاریدەدەری ڕاگر و ئەندامانی ئەنجوومەنی فاکەڵتی و سەرۆکی لێژنەی تاقیکردنەوەکانەوە پێشوازیی لێکرا.

 لە گشت ئەم سەردانانەدا سەرۆکی زانکۆی کۆیە پاڵپشت بە پلانی ستراتیژیی زانکۆ و بە تایبەتی کۆڵەکەی سەرەکیی "سەرکەوتنی خوێندکاران" لە نزیکەوە  هۆڵەکانی بەسەر کردەوە و لەگەڵ خوێندکاران دەربارەی تاقیکردنەوەکان قسەی کرد و هاوکات لە دەرەوەی هۆڵەکانی تاقیکردنەوەش لەگەڵ چەندین گرووپی جیاوازی خوێندکاران گفتوگۆی کرد و لە پەراوێزی لەگەڵ لێژنەی تاقیکردنەوەکان وێڕای دەستخۆشی لە لێژنەکان هەروەها پێداگری لەسەر کار کردن بۆ ڕەخساندنی کەش و ژینگەیێکی لەباری تاقیکردنەوەیی بۆ خوێندکاران کردەوە.