کۆیە | ڕاگەیاندنی زانکۆ

لە چوارچێوەی بەدواداچوونە بەردەوامەکان و ئامادەکارییەکانی سەرۆکایەتی زانکۆی کۆیە بۆ پێشوازیکردن لە ساڵی نوێی خوێندن، سەرۆکی زانکۆی کۆیە پ.د. محەمەد حسیب صدیق، کۆبوونەوەیەکی فراوان و گرنگی لەگەڵ ئەنجومەنی فاکەڵتیی پەروەردە ئەنجامدا.

ڕۆژی دووشەممە ١٠ی پووشپەڕی ٢٧٢٦ی کوردی بەرانبەر ٢٩ی حوزەیرانی ٢٠٢٦ی زایینی سەرۆکی زانکۆی کۆیە پ.د. محەمەد حسیب صدیق بە ئامادەبوونی یاریدەدەری سەرۆکی زانکۆ بۆ کاروباری کارگێڕی و دارایی پ.ی.د. یادگار عبد الله علی، یاریدەدەری سەرۆکی زانکۆ بۆ کاروباری خوێندنی باڵا پ.د. هشیار زکی، یاریدەدەری سەرۆکی زانکۆ بۆ کاروباری خوێندکاران پ.ی.د. ئاژین طاهر صابر و ئەمینداری ئەنجوومەنی زانکۆ م. چیا جەوهەر لەگەڵ ئەنجوومەنی فاکەڵتیی پەروەردە کە پێکهاتبوون لە؛ ڕاگری فاکەڵتی پ.د. سەفین جلال فتح الله، یاریدەدەرانی ڕاگر پ.ی.د. هیوا ئەمین جەلال و پ.ی.د. ئالان صلاح سعدی، سەرۆکی بەشی مێژوو پ.د. کامەران عزیز، سەرۆکی بەشی جوگرافیا پ.ی.د. ئاشتی سەلام، سەرۆکی بەشی زمانی ئینگلیزی م. ئەوین طاهر صابر، سەرۆکی بەشی زمانی کوردی پ.ی.د. تەلار صباح، سەرۆکی بەشی زمانی عەرەبی د. ئازاد عبد الله محمد، سەرۆکی بەشی پەروەردەی ئایینی پ.ی.د. ئارەزوو ڕەشید، سەرۆکی بەشی پەروەردە و دەروونزانی پ.ی.د. بەهات عبد الرزاق سعید کۆبوویەوە.

تیشکخستنە سەر ژینگەی خوێندن و ژێرخان

لە تەوەرێکی سەرەکیی کۆبوونەوەکەدا، بەشێوەیەکی چڕوپڕ سەرجەم پێداویستییە ئەکادیمی، کارگێڕی، خزمەتگوزاری و ژێرخانییەکانی فاکەڵتییەکە خرانە بەرباس و گفتوگۆی  پۆلێنکراو لەسەر چارەسەرکردنی ئاستەنگە خزمەتگوزارییەکان و پەرەپێدانی ژێرخانی فاکەڵتییەکە کرا. ئامانج لەم هەنگاوانە، فەراهەمکردنی ژینگەیەکی گونجاوتر و بەرزکردنەوەی ئاستی پرۆسەی فێربوون و پێشخستنی ئەو خزمەتگوزارییانەیە کە ئاڕاستەی خوێندکاران و مامۆستایان دەکرێن.

جەختکردنەوە لە کاری پێشوەختە و هاوبەش

پ.د. محەمەد حسیب صدیق، سەرۆکی زانکۆی کۆیە، ستراتیژیەتی زانکۆکەی بۆ قۆناغی داهاتوو ڕوونکرایەوە و ڕایگەیاند:

"ئامادەکاریی پێشوەختە و هەماهەنگیی ڕاستەوخۆی نێوان سەرۆکایەتی زانکۆ، فاکەڵتییەکان و بەڕێوەبەرایەتییە پەیوەندیدارەکان، گرەنتی سەرکەوتنی پرۆسەی خوێندنی داهاتووە، تا بتوانین بە ئاستێکی زانستی و کارگێڕی زۆر بەرزتر لە ساڵانی ڕابردوو دەست پێبکەین."

هاوکات، ئەندامانی ئەنجومەنی فاکەڵتیی پەروەردە کۆمەڵێک پێشنیار، بۆچوون و ڕاپۆرتی پێداویستییەکانی خۆیان خستەڕوو. لە بەرامبەردا، سەرۆکایەتی زانکۆ پاڵپشتی تەواوی خۆی بۆ سەرخستنی داواکارییەکان و چارەسەرکردنی کێشەکان دووپاتکردەوە.

ئامانجی کۆتایی

ئەم کۆبوونەوەیە لە چوارچێوەی زنجیرە بەسەرکردنەوە و سیاسەتی نەگۆڕی زانکۆی کۆیەدا دێت، کە ئامانجی سەرەکی بریتییە لە بەهێزکردنی بەڕێوەبردنی ئەکادیمی، بەرزکردنەوەی کوالێتی خوێندن، و دابینکردنی کەشێکی زانستیی هاوچەرخ بۆ ستافی مامۆستایان و خوێندکاران.