کۆیە | ڕاگەیاندنی زانکۆ

دەستپێکی کۆنفرانس و دروشمی سەرەکی

بە مەبەستی پەرەپێدانی توێژینەوە زانستییەکان و پتەوکردنی هەماهەنگیی ئەکادیمی، ڕۆژی چوارشەممە (٧ی تشرینی یەکەمی ٢٠٢٦)، «شەشەمین کۆنفرانسی نێودەوڵەتیی ئەندازیاریی جیۆتەکنیک – عێراق (6ICG-IRAQ 2026)» بە دروشمی «ناسین و زانینی زەوی، پاراستنی داهاتوو» بە میوانداریی زانکۆی بەغدا دەستی بە کارەکانی کرد و بۆ ماوەی دوو ڕۆژ بەردەوام بوو.

هەماهەنگیی ئەکادیمی و لایەنە ڕێکخەرەکان

ئەم کۆنفرانسە لە چوارچێوەی هاوکارییە زانستییەکانی نێوان زانکۆ و دامەزراوە ئەکادیمییە دیارەکاندا ڕێک خراوە. فاکەڵتیی ئەندازیاریی زانکۆی کۆیە بە هاوبەشی لەگەڵ کۆمەڵەی زانستیی جیۆتەکنیکیی عێراقی (ISSMGE)، کۆلێژی ئەندازیاریی خەوارزمی لە زانکۆی بەغدا، زانکۆی کۆمار بۆ زانست و تەکنەلۆژیا، و بەشی ئاوەدانکردنەوەی سەرۆکایەتیی زانکۆی بەغدا، سەرپەرشتیی بەڕێوەچوونیان کردووە.

بەشداریی کارای زانکۆی کۆیە

زانکۆی کۆیە جگە لەوەی هاوبەشی سەرەکیی کۆنفرانسەکە بوو، لە هەمان کاتدا بە شاندێکی باڵای ئیداری بە سەرۆکایەتیی ڕاگری فاکەڵتیی ئەندازیاری (پ.ی.د. گەلاوێژ بەکر باپیر) بەشداریی کۆنفرانسەکەی کرد؛ هاوکات مامۆستایانی فاکەڵتیی ئەندازیاری بە پێشکەشکردنی چوار توێژینەوەی زانستی و بەڕێوەبردنی سێ پانێلی پسپۆڕانە، بەشدارییەکی کارا و بەرچاویان لە سەرخستنی کارەکانی کۆنفرانسەکەدا تۆمار کرد.

تەوەرە زانستی و ئەندازیارییەکان

کۆنفرانسەکە شەش تەوەرەی گرنگی لە خۆ گرتبوو کە بریتین لە: ئەندازیاریی جیۆتەکنیک، ئەندازیاریی بیناسازی و شارستانی، بەردەوامی و وزەی نوێبووەوە، بەڕێوەبردنی سەرچاوەکانی ئاو، ئەندازیاریی ژینگە و لێکەوتەکانی گۆڕانی کەشوهەوا، هەروەها گەشەپێدانی شارسازی و تەلارسازیی هاوچەرخ.

ئامانجە کردەیییەکان و ڕەنگدانەوە لە پلانی ستراتیژیدا

سەبارەت بە ئامانجەکانی کۆڕبەندەکە، ئاماژە بەوە کراوە کە کۆنفرانسەکە بووە پلاتفۆرمێکی پێشکەوتوو بۆ ئاڵوگۆڕی ئەزموون و داهێنانە ئەندازیارییەکان، و هەوڵی دا چارەسەری کردەیی بۆ ئاستەنگە ژینگەیی و بیناسازییەکان بدۆزێتەوە. ئەم بەشدارییە بەرفراوانە لە ئاستی نێودەوڵەتیدا، ڕەنگدانەوەی پلانی ستراتیژیی زانکۆی کۆیە (٢٠٢٣–٢٠٢٧)ـە لە ڕێگەی کۆڵەکەکانی «توێژینەوە و داهێنان» و «خزمەتکردنی کۆمەڵگە»وە، بە ئاراستەی چەسپاندنی ڕۆڵی کاریگەری زانکۆ لە پێشخستنی کەرتی زانست و ئەندازیاریدا.